कुणबी समाजाच्या दाखल्यांबाबत कुर्डूवाडी प्रांत कार्यालयाकडून जाणीवपूर्वक अडवणूक केली जात असल्याचा गंभीर आरोप, सकल मराठा समाज करमाळा यांच्या वतीने करण्यात आला आहे. यासंदर्भात जिल्हाधिकारी सोलापूर यांना निवेदन सादर करून तात्काळ दखल घेण्याची मागणी करण्यात आली आहे. अन्यथा नववर्षाच्या पहिल्याच दिवशी म्हणजेच १ जानेवारी २०२६ रोजी कलेक्टर कार्यालय सोलापूर व कुर्डूवाडी प्रांत कार्यालयासमोर एकदिवसीय धरणे आंदोलन करण्यात येईल, असा इशारा ही देण्यात आला आहे.
निवेदनात म्हटले आहे कि, प्रांताधिकारी कुर्डूवाडी यांच्याकडून कुणबी दाखल्यांची प्रक्रिया मुद्दाम संथ व अडवणुकीची ठेवली जात आहे. यामुळे अनेक गरजू अर्जदारांचे शैक्षणिक, शासकीय तसेच इतर लाभांची प्रकरणे रखडत असून समाजात तीव्र नाराजी पसरली आहे. निवेदनात पुढे म्हटले आहे कि, अर्जदार स्वतः सही करून प्रतिज्ञापत्र सादर करत असताना, ‘सेल्फ अटेस्टेड’ या कारणावरून अर्ज अडवले जात आहेत. याशिवाय घरातील एका प्रकरणासाठी तहसीलदार प्रमाणित प्रत ग्राह्य धरली जात असताना, त्याच कुटुंबातील दुसऱ्या प्रकरणासाठी ओरिजिनल कागदपत्रांची मागणी करून, अनावश्यक अडचणी निर्माण केल्या जात आहेत. कुटुंबामध्ये पूर्वीचे जात पडताळणी वैधता प्रमाणपत्र अस्तित्वात असताना ही त्या कागदपत्रांना कोणती ही किंमत न देता, प्रकरणे बाजूला ठेवली जात असल्याचे निवेदनात नमूद केले आहे. महसुली पुरावे उपलब्ध असताना ही अनावश्यक फेरफार करण्याची मागणी करून, अर्जदारांना वारंवार कार्यालयाच्या फेऱ्या माराव्या लागत आहेत.
करमाळा तहसील कार्यालयातून कुर्डूवाडी प्रांत कार्यालयाकडे, आवक-जावक होणाऱ्या प्रकरणांबाबत ही स्पष्ट मागणी करण्यात आली आहे. त्रुटी काढून परत आलेली प्रकरणे फेरसादर करताना, तहसीलदारांची सही घेऊन करमाळा तहसील कार्यालयातूनच ऑनलाइन प्रक्रिया पूर्ण करण्यात यावी. अशी मागणी सकल मराठा समाजाने केली आहे. तरी वरील सर्व मुद्द्यांची गंभीर दखल घेऊन, संबंधित अधिकाऱ्यांना तात्काळ सूचना द्याव्यात. अशी ठाम मागणी जिल्हाधिकाऱ्यांकडे करण्यात आली आहे. जर याबाबत सकारात्मक निर्णय न झाल्यास, सकल मराठा समाज करमाळा यांच्या वतीने जिल्हाधिकारी कार्यालय सोलापूर तसेच कुर्डूवाडी प्रांत कार्यालयाचा निषेध करत, १ जानेवारी २०२६ रोजी एकदिवसीय धरणे आंदोलन करण्यात येईल. अशी स्पष्ट भूमिका समाजाच्या पदाधिकाऱ्यांनी मांडली आहे.
या निवेदनामुळे प्रशासन काय भूमिका घेते? याकडे संपूर्ण तालुक्याचे लक्ष लागले असून, कुणबी दाखल्यांची प्रक्रिया सुरळीत होण्यासाठी तातडीने ठोस निर्णय घेण्याची मागणी जोर धरू लागली आहे.
कुर्डूवाडी प्रांत ऑफिस मधून जाणीवपूर्वक मराठा समाजातील विद्यार्थ्यांचे दाखले काढण्यास त्रास दिला जात आहे. याबाबत लवकरच मोठे जन आंदोलन करमाळा येथे उभा करणार आहोत.
सचिन काळे, मराठा समन्वय व मराठा सेवा संघ, करमाळा तालुका अध्यक्ष
Post a Comment